Hartbeespoort-inwoners is keelvol... (ons sal maar nie
die ander woord gebruik nie) en dors en vuil. Sommige is al weke sonder
water, hang af van waar jy woon, en daar blyk nie hoop te wees nie
want niemand weet enigiets nie.
Blykbaar ook nie die munisipaliteit nie!
Woedende, desperate en bedrukte inwoners se oproepe na die Kormorant het die afgelope week ons telefoonlyne beset.
“Wat gaan aan met die water?” was die standaard navraag. Hulle bel die munisipaliteit en die raadslede en is niks wyser nie.
Die munisipaliteit sê hulle skakel die klaers deur na
die betrokke afdeling en dan word die foon neergesit, was elke inwoner
se klagte.
Nou vra hulle maar die koerant. Nou kyk, ons weet baie, maar nie alles
nie, en tot Dinsdag het die munisipaliteit geen woord gesê nie. Totdat
‘n raadslid glo gedreig het om ‘n nasionale televisiespan te ontbied,
verneem ons.
Woensdag hoor ons die mense gebruik te veel water en nou gaan die
water snags afgeskakel word om die reservoirs op te vul. Hoekom nou, na
vyf weke word daar eers ‘n plan van aksie bedink, en gaan dit help?
Maar die grootste steen des aanstoots is die munisipaliteit se apatie
ten opsigte van die situasie. Buiten bloot goeie maniere, is dit nie die
munisipaliteit se plig om diegene wat hulle salarisse betaal se navrae
te beantwoord nie?
Die enigste gevolgtrekking waartoe ons kom is dat hulle ook nie weet wat aangaan nie, of net nie omgee nie.
En om die inwoners te blameer vir die watertekort is ‘n verdomde
cheek. Die inwoners word gevra om minder water te gebruik terwyl die
munisipaliteit se waterpype soos siwwe lek en daagliks in ons strate
afspoel.
Ons betaal vir die onderhoud en herstel van die pype en
as dit aangemeld word is daar net beloftes of honderde verskonings
waarom dit nie onmiddellik gedoen kan word nie. Dit terwyl die meeste
mense nie ‘n druppel water in hul huise het nie.
Nog erger, by die munisipale kantore in Schoemansville, word die
plaveisel afgespoel en sekuritietsondernemings was hul voertuie dat die
seep so spat! Mens is sprakeloos.
Om terug te keer na die Madibeng burgemeester se 100 dae plan: Die
derde prioriteit op die plan was die versekering van konstante
watervoorsiening in die gebied... maar ons almal weet mos nou al die
plan was net ‘n klomp leë beloftes en liegstories.
Wie glo die storie dat Randwater op 5 Desember aangesluit word? Beslis nie ons nie...
| 